ހެރެތެރެ ކަޅު އަނދިރީގައި: ރިސޯޓުގައި ކަރަންޓް ނެތިފައި

އައްޑު އަތޮޅުގައި މިވަގުތު ހިގަމުން އަންނަ ހަމަ އެކަނި ރިސޯޓް ހެރެތެރެ (ހަނދުފުށި) ގައި ކަރަންޓް ނެތި 12 ގަޑި އިރަށް ވުރެން ގިނަ އިރުވެއްޖެ އެވެ. 520 އެނދުގެ މިރިސޯޓްގައި މިވަގުތު އުޅެނީ ގާތްގަޑަކަށް 30 ވަރަކަށް ގެސްޓުންނެވެ. މީގެ ހަފްތާއެއްހާ ދުވަސް ކުރިން ވެސް ހެރެތެރެ އިން ވަނީ 9 ގަޑި އަށް ވުރެން ގިނައިރު ވަންދެން ކަރަންޓް ކަޑައިގެން ގޮސްފައެވެ. އެފަހަރުވެސް އަދި މިފަހަރުވެސް ކަރަންޓް ކަޑައިގެން ދިޔައީ ރިސޯޓުން ޑީސަލް ހުސްވެ ޖަނަރޭޓަރުތައް ނިވުމުގެ ސަބަބުންނެވެ. ފުރަތަމަ ފަހަރު ކަރަންޓް ނެތިގެން ގެސްޓުން ޝަކުވާ ކުރުމުން ރިސޯޓުގެ މެނޭޖްމަންޓުން ބުނެފައި ވަނީ އިންޖީނުތަކަށް ހޮނުއެޅުމުގެ ސަބަބުން ދިމާވެގެން އުޅޭ ކަމެއް ކަމަށެވެ. މިހެން ބުނިދުވަހުގެ އަނެއްދުވަހު އެރިސޯޓުގެ އައިޓީއަށް ވަނީ ހޮނު އަޅާފައެވެ. ލިބުނު ގެއްލުންތައް އަދިވެސް ރަގަޅުވެފައި ނުވާ އިރު މިހާރު މިވަނީ ރިސޯޓުގައި ކަރަންޓް ނެތިފައެވެ.
ފަޅުރަށެއް ފަދައިން ރިސޯޓް އޮތަސް ރަށަށް ކޮންމެވެސް ވަރަކަށް ގެސްޓުން އެބަގެނެއެވެ. އަދި މިހާރު ވެސް ގެސްޓުން ކޮޅެއް އެތަނުގައި އެބައުޅެއެވެ. މިހެން ކަންތައްތައް ދިމާ ވުމުން މިކަމުގެ ނޭދެވޭ އަސަރު މުޅި މިރާއްޖޭގެ ފަތުރުވެރިކަމަށް ކުރާނެކަން ކަށަވަރެވެ. އަދި ހާއްސަކޮށް އައްޑުއަތޮޅަށް މިކަންކަމުގެ ސަބަބުން ނޭދެވޭ އަސަރު ކުރާނެ ކަން ޔަގީނެވެ. ފަތުރުވެރިންގެ މެދުގައި ރާއްޖޭގެ އަގު ވެއްޓި އެމީހުން ޗުއްޓީ ހޭދަކޮށްލަން އަންނަން ބޭނުން ނުވާ ފަދަ ތަނަކަށް ރާއްޖެ ވެގެން ހިގައިދާނެއެވެ.
މިއަދު މިދިމާވެފައި ވާ ކަންތައްތަކަކީ އަހަރެމެން ކޮންމެ ދިވެހި ދަރިއަކުވެސް އެކަމާ ދޭތެރޭގައި ވިސްނަން ޖެހިފައިވާ ކަމެކެވެ. މިއަދުގެ ސަރުކާރުން ވެސް މިކަމަކީ ވަގުތުން ވަގުތަށް ހައްލުކުރުވަން ޖެހިފައިވާ ކަމެކެވެ. މުޅި ދިވެހިރާއްޖޭގެ އަގު ފަތުރުވެރިންގެ ކުރިމަތީގައި ވެއްޓުނަނުދީ ހިފަހައްޓަން ޖެހޭނެއެވެ.